بطاقة رقم 3 à toi R...

-ألو، مدام لازم تجيبلنا بطاقة رقم 3, أكيد جدا، السيد المسهول حاجتو بها..

-حاضر يا للا، نهار الإثنين تكون عندك..

-إزربلي روحك راك روتار..

-روتار؟؟ ماهو كالناس الكل، الوقت مجعول باش نفوتوه!!

-نفوتوه و نزيدو فيه..

-باهي في لمان

-في لمان

مشيت دوقة دوقة للمركز، ما منظم أكثر مني كان والديهم هوما..إستنيت إستنيت حتى تلعولي الورقة الخضرا..جات الورقة ..عمل هكا السيد المتكفل بوكرش (كي أصحاب لكراسي الكل بالكروش و الفيستات الكوير) و قلي:

-تي هاي فيارج الورقة!!

-ما قعد فيارج في هالبلاد كان لاوراق، و الدوسيات، و الشهايد البيدونة!! ( و ملاحظة مانيش نحكي عل إيمان ناسيونال!!)

خرجت ملمركز رميت عيني عل بطاقة "حسب هاته الوثيقة لا وجود لسوابق عدلية...إلخ"..زعمة يا لخضر؟؟

- الاسم واللقب و الهوية؟

-فلانة بنت فلان، و الهوية ضايعة، و الجنسية مشكوك فيها..

- الحالة المدنية؟

-حالة حليلة

- العمر؟

-العمر بيد ربي، تعد تغلط!

-السكنى؟

-أرض ربي واسعة ما تكتفش ربي!!

-المستوى العلمي؟

-كمشة شهايد ما يشهدوا بشي!! عقوبة ربي ما نفهم والو!!!

-البطاقة عذراء؟

-لا خويا خضرا!!

-يعني؟؟

-يعني ما فيها شي، ما دام القانون ما يحميش المغفلين واللي على باب الله!!

من فضلك فسرلي باش نجم نقيد الملاحظات الكل في هل دوسي..

-شد عندك: الدوسي نظيف من برة، مدام القانون ما يعاقبش عل تبهنيس، الخطية ما تتحسبش كي نقلب تحت حس مس!! الحبس مفيهاش إلي يتمسكن، إلي يتمنيك على أرواح و أحاسيس الناس، كي بو فردة مخليني البرى بعيد على حيتو، رغم إلي دقدقت عباد، لوراق تقعد نظيفة كي نحقر لفقير، واليتيم، واللي يمشي الحيط الحيط..بطاقتي رقم ثلاثة بيضة كي نعفس عل عرب واللي نسكر به في ليلة يعيش عيلة!! مواطنة شريفة أنا يا سيد كي ما نعلش صوتي و نطالبش بحقي فل التعبير والنقد، أما نحي رب حق المسكين و الزاولي كي تواتي، هذي جريمة؟؟

- لا يا مدام ما عنا حتى فصل يخص التبهنس و التجوبير و التفشليم!!

-اموري 5/5 يا سيد هكا المواطنة ولا بلاش!!

-الله يرحم الكرش إلي جابتك!! لكن يا مدام وصلنا تقرير تكميلي يقول اللي ساعات لسانك طويل و تحكي فالدين، واليسار، والسياسة شيوعية ولا سيسمها!!

-خاطي أختك يا وخي!!!!!!شوية تفليم و هزان قدر في روحي قدام الناس!!عالعينن و برة....ساعة ساعة مجبود حديث على  خاطر أختك أنا مثقفة و قافزة، بخلاف الحمير المنيكير لازمني شوية اكسسوارات باش نكمل التجوعيب، كيفي كيف غيري، رشة تعوليم ندزو بيها الفازة ..سجل عندك راني متخبية ورى أسماء مستعارة، أهوكة شوية صياح و شهود على ذبيحة قنفود، جدت عليك قضية؟ جدت عليك سياسة؟  جدت عليك ثقافة؟ ربي يخلي المسيرات و الاجتماعات نسرح فيهم ساقي و نوري كشختي فماش ما يطيح عليا كاستينغ ولا حويجة!!!ماهي لوبانة نلوكو في والديها من فم الفم لين خمجت و نتنت!!!! راني تونسية من الصميم، فل وجه مرايا وفالقفى فلاية!!

-نسجل؟؟ 

-سجل أنا كربي، سجل دوسي نظيف  سجل من داخل بيدون فارغ مش معبي، سجل كل شي أما بجاه ربي خبي، خلي الناس تتخيلني بطل ولو أنا كالزبي!!